Stille Nag, Heilige Nag . . .
Van een ding kan jy seker wees, dit was stíl. So stil dat jy die sterre sou kon hoor suis. Dalk was daar ’n skaap wat blêr, of een van die wyse manne wat in die donker struikel en uitroep . . .
In ’n terugswaai van die pendulum, ’n teenpool vir vandag se roesemoes, werkverslawing, pienk ontploffing en die Real Housewives se myne-is-toggroter-as-joune ekshibisionisme, dryf “stilte” drie trends: stil weelde (quiet luxury), stille onttrekking (quiet quitting) en stil tye (quiet times).
Eers ’n definisie:
stil•te
1. Maak min of geen geluid nie. 2. Oordeelkundig/diskreet, wat in die geheim of met matigheid uitgevoer word (Oxford Languages, languages.oup.com)
STIL WEELDE
Een modegier is nou oral. Maar as jy jou oë knip, mis jy dit dalk. Mense wat nie gebaai in weelde gebore is nie en hul rykdom self bymekaargemaak het, is dikwels doodgelukkig om herkenbare logo’s en ontwerpersklere te dra. En dié met “ou” geld? Nooit gesien nie. Nie so ooglopend nie, in elk geval. se opgedolliede parade nie. Wel die Britse koningshuis wat al jare lank op dié onderbeklemtoonde manier aantrek. Sê jy “boring”? Toegegee, ’n ander naam vir die trend is “borecore”.
