MET sy pelsagtige lendekleed en hooftooisel van blare gee hy lewe aan die geliefde karakter uit die pen van William Shakespeare.
Die akteur is aantreklik, atleties en ondeund, nes die mitologiese woudwese Puck in A Midsummer’s Night’s Dream. En hy rek, strek en rol die hele verhoog vol soos ’n mens van dié karakter sou verwag. Tog is Caleb Swanepoel (28) soos g’n Puck wat jy al ooit gesien het nie, want hy doen dit alles met net een been.
En al lyk hy so tuis op die planke in dié verhoogproduksie, het ’n traumatiese draai op sy lewenspad hom tot hier gebring. Dis om die waarheid te sê ’n wonderwerk dat hy leef. Caleb se regterbeen is agt jaar gelede in die see by Buffelsbaai deur ’n grootwithaai afgeskeur. Hy en sy
