Osprey Exos 58-rugsak
’n Rugsak met hierdie volume weeg gemiddeld sowat 2,3 kg nog voordat jy ’n enkele stukkie droëwors ingepak het. Die Exos weeg ’n volle kilogram ligter.
Die sak het steeds die kenmerkende Ospreyergonomika, maar is hier en daar gestroop. Die Velcroverstelstroke in die skouerbande en heupgordel ontbreek en laasgenoemde se kussings is ook heelwat dunner en die raam is in sy geheel minder bonkig. Die sak het nie die twee standaardkompartemente nie, maar slegs een grote, en die dakkompartement kan heeltemal verwyder word. (Daar’s ’n ekstra flap wat jy dan oor die groot kompartement se trekkoordopening toeknip.)
Teen die raam is egter steeds ’n glyspoor waarop jy die saklengte na gelang van jou eie torso met tot 10 cm kan verstel, en danksy die AirSpeed-rugpaneel se vering sit die rugsak gerieflik en dit laat voldoende ventilasie toe.
Daar’s ’n sloop vir ’n waterblaas, twee diep kantsakke vir waterbottels en ritssakkies op die heupgordel. Lang, verstelbare stroppe met verskeie ankerpunte voorsien genoeg vasbindplek vir jou slaapmat en tent buite-op. Maar jy kan dié ook afhaal wanneer jy dit nie nodig het nie.
Die rugsak is ook heeltemal van herwinbare materiaal gemaak.
R4 800
Sea to Summit Spark SpII-slaapsak
Die sak der alle sakke. Dit kos drie keer meer as sy naaste mededinger, maar die Spark SpII is tans met ’n skamele 490 g die heel ligste in sy liga. Donsprodukte se gehalte en gevolglik ook sogenaamde vulkapasiteit (die