SY VERWYL graag haar dae deur in die tuin van die Hillmorton Psigiatriese Hospitaal in Christchurch te woel.
Die tuin het gedurende die pandemie verdor, maar intussen het die stil vrou dit bedding vir bedding weer in ’n lushof omskep. En dis in dié vreedsame omgewing waar sy glo die naaste aan haar drie blondekoppies voel.
Die vrou in die tuin is Lauren Dickason, die Suid-Afrikaanse voormalige dokter wat teregstaan op die moorde van haar tweeling, Maya en Karla (2), en haar oudste, Liane (6).
Die kinders se dood, net weke ná die Dickasons se emigrasie van Pretoria na Nieu-Seeland, het destyds skokgolwe deur albei lande gestuur. En op die vooraand van haar verhoor, wat op 17 Julie sou hervat, het ’n hegte Suid-Afrikaanse vriendin besluit om ’n eksklusiewe blik te gee op hoe dit met Lauren gaan. Want vir Nina* is Lauren nie die monster waarvoor sommige mense haar uitkryt nie. Die Lauren wat sý ken is ’n liefdevolle ma wie se kinders haar hart se punt was.
