DIE N1-snelweg is gewoonlik nie jou maat nie, maar vandag is daar boonop ’n sluier van digte mis oor Johannesburg en omstreke. Dis iets wat Gautengers nie aldag trotseer nie en die verkeer kruie stadig voort.
Eindelik draai ons af na Pretoria en skielik is dit asof ’n reusehand die misgordyn opsyskuif.
Teen die tyd dat ons by die woonstelgebou in Murrayfield aanklop, is die winterdag sonnig en baldadig – nes die persoonlikheid van die vrou wat ons verwelkom.
“Kyk nou net, ek het vir julle sonskyn gebring,” spot die sanger en komediant Bibi du Preez (32).
Terwyl sy tee aandra, vertel Bibi sy het drie weke gelede vanaf Donkerhoek, so ’n halfuur se ry oos van Pretoria, hierheen getrek.
“Ek het op ’n plaas gewoon in my eie woonstel en
