SPESIALE FOKUS VEE FREDALETTE UYS
Die bokbevolking neem wêreldwyd toe, en word veral in Europa gewilder vanweë die lenige vleis.
Só het dr. Ariena Shepherd, ’n veearts wat in die behandeling van bokke en skape spesialiseer, op die jaarlikse kongres van die Herkouerveterinêre Vereniging van Suid-Afrika (Ruvasa) gesê. Sy het gepraat oor verskille in bestuur by bokke, en ’n paar belangrike punte uitgelig.
Wat bokke se slaggewig betref, is die gemiddeld nog redelik swak. Melkproduksie het die afgelope 20 jaar aansienlik verbeter, met bokmelk wat om verskeie redes gewilder word.
Die melk kan byvoorbeeld dadelik gevries word sonder die pasteurisasieproses. Vir verkope moet melk steeds gepasteuriseer word. Bokmelk is ’n goeie opsie vir kinders met laktose-intoleransie. Sommige bokke produseer reeds 15-18 liter melk per dag.
Bokke teenoor skape
Daar is ’n paar maniere om bokke en skape van mekaar te onderskei. Bokke het 60 chromosome (dieselfde as beeste), terwyl skape slegs 54 het. Ondanks hierdie verskil is kruisteling tussen skape en bokke moontlik, en die hibriede nageslag kan vrugbaar wees.
Daar is ongeveer 300 bokrasse ter wêreld. Dit sluit vleis-, melk-, bokhaar- en kasjmierbokke in. Die Boerbok wat in Suid Afrika geteel is, is die enigste ras wat slegs vir vleis geteel