Ugab Terrace Lodge
’n Padteken waarsku dat dit hef aan is teen ’n stewige helling voordat ’n mens die lodge bereik. Weet jy wat word gesê van steil paaie? Ek ook nie, maar dis dalk iets soos hoe hoër, hoe mooier. Want jy sal wraggies ver moet soek om ’n beter 360°-uitsig te kry oor die Ugabvallei as hier van die Ugab Terrace Lodge af wat op een van die terrasse gebou is.
Sekere lodges maak hulle daaraan skuldig om die omliggende natuur te onderspeel deur jou met luukse dekor te verlei om eerder binnenshuis te bly. Nie dié lodge nie. Hier voel jy deel van die omgewing danksy die balans tussen eenvoud en elegansie; eindelose uitsigte en netjiese kamers met dik handdoeke en wit linne.
Van hier bo af is die sonsondergange oor die terrasse sonder gelyke. Dit gaan dalk oorreding verg om aan die lodge se aktiwiteite deel te neem, want dit is ’n plek vir met ’n boek ontspan en jou oor te gee
