HIEROOR PRAAT ONS
Haar stem sing voort. La Divina, die godin van opera, of La Callas, soos die Griekse sopraan Maria Callas ook bekend gestaan het, sou vanjaar honderd geword het.
’n Mens kan kies en keur uit ’n magdom Callas-opnames in die musiekbiblioteke van stromingsdienste soos Spotify, YouTube en Apple Music. Tussen 1949 en 1968, toe die diva die operatoneel oorheers het, is immers 26 volledige operas en meer as ’n dosyn arias opgeneem waarin sy opgetree het.
In die voorwoord tot David Bret se 1997-biografie Maria Callas: The Tigress and the Lamb skryf die Spaanse sopraan Montserrat Caballé: “Callas was ’n wonderlike vrou, ’n vriendin, ’n rots. Die wêreld sal nooit weer haar gelyke sien nie . . .”
Callas is op 2 Desember 1923 in New York gebore en gedoop met die gewigtige naam Maria Anna Cecilia Sofia Kalogeropoulos. Haar pa, George, ’n apteker, het hul van verkort. Die liefdelose huwelik tussen hom en haar ma, Evangelia (genoem Litsa), is beëindig toe Callas veertien jaar oud was. Sy, haar ouer suster, Yakinthi (genoem Jackie), en hul ma is terug Athene toe. ’n Boetie, Vassilis, is ’n jaar voor haar geboorte dood aan breinvliesontsteking.
Dit is in hierdie tyd, danksy gratis
