Ons is amper by ons bestemming, kondig die kaptein aan. Soos die vliegtuig daal en die digte wolkmassa in vlieswolke begin verander, sien jy plek-plek groen deur die mis. En dan, skielik, maak die wolke heeltemal oop en dit lyk asof die hele aarde bedek is met ’n juweelgroen kombers. Só ruig is die oerwoud onder jou dat dit moeilik is om te skat hoe hoog jy vlieg of hoe vinnig jy daal, want al wat jy kan sien, is ’n asemrowende soliede massa groen boomtoppe.
Dit is die gesig wat jou begroet onderweg na die aanloopbaan van die Mexikaanse stad Cancún op die Yucatan-skiereiland, bekend vir sy soel Karibiese waters en omringende oerwoud. Maar ook vir Amerikaanse toeriste, partytjies en klubs. Dus is ons eindbestemming eerder Tulum, ’n twee uur lange rit in ’n lugverkoelde bus vanaf die lughawe. Ewe veel oerwoud en see, minder voete en harde musiek.
Die avontuur het begin in Mexikostad, ons vertrekpunt, en ’n uiters aangename verrassing.