Op Instagram stel Sherlin Barends haarself bekend as Bold. Bald. Bilingual.
Sy was altyd die raakvatter, die presteerder, die “sterk” vrou.
En toe, in die grendeltyd, het die “monsters” van haar verlede haar begin bekruip.
Vir my sê sy: “Ek is Sherlin van Idasvallei. My mense is storievertellers wat saam kan lag, ons is nederige, warme mense. Dis my anker. As ek daar veilig voel, kan ek my vlerke sprei.”
Weeksdae bied sy die radioprogram Kfm Mornings with Darren, Sherlin and Sibs aan. Sy, Darren Simpson en Sibongile Mafu staan bekend as ’n gul driemanskap.
Onlangs was sy ook die aanbieder van VIA (DStv-kanaal 147) se werklikheidsreeks Houvrou of trouvrou?. Sy tree gereeld as seremoniemeester op, doen stemwerk, is motiveringspreker. Haar hart se punt is Community Keepers, ’n organisasie sonder winsbejag, waar sy beskermvrou is. Hulle help by skole met berading vir getraumatiseerde leerders.
In ’n koffieplek kunsslangvel-Birkenstocks, groen energiedrankie in die hand.
