RIA streel oor Freyja se gladde rug. Die kat skuur tevrede teen haar aan en glip tot op haar skoot.
“Waar op aarde kom jy vandaan, stoutgat? Loop lekker rond, nè. Toemaar, ek is tjoef-tjaf uit, dan gaan ons weer lang ente stap.” Die kat gesels purrpurr saam asof sy elke woord verstaan.
Toe die bekende voetstappe in die gang afkom kyk Ria op die muurhorlosie.
Tienuur!
“Kom-kom, uit is jy!” Sy stoot Freyja se swaar lyf in die rigting van die venster. “Uit,” por sy die kat verder aan en sug verlig toe Freyja op die vensterbank spring en buitentoe verdwyn.
“Môre Tannie! Hoe gaan dit vandag?”
Dokter Prinsloo staan vriendelik in die deur, tel haar lêer van die tafel af op en stap tot langs haar bed.
Oulike kind dié. Voor haar grootgeword en nou ’n suksesvolle dokter. Hy het sy ma se oë en sy pa se glimlag.
“Nee wat, goed dankie, kind. Behalwe nou vir die geswikte