Ek en my dogter het op ‘n teerpad van die noordelike KwaZulu-Natalse dorp, Hluhluwe, na die gedenkhek van die Hluhluwe-iMfolozi Park gery. Die laaste keer wat ek hierdie reis onderneem het, was in 1975 saam met my ouers en toe was hierdie bloot ‘n stuk grondpad. Dit was een van daardie full circle oomblikke, aangesien ek nou hierdie besonderse bewaringsgebied vir my dogter wou wys.
Ek was baie opgewonde, maar ook ‘n bietjie skrikkerig – my herinneringe aan hierdie wildtuin is van ‘n groep renosters wat op ‘n mistige bergtop gelê het en ek was opgewonde dat my dogter ook só ‘n toneel sou kon beleef. My bekommernis was te wyte aan die feit dat ek vir die eerste keer ooit saam met ‘n toeroperateur (wat deur ‘n vriend vir my aanbeveel is) gereis het, asook al die hartseer stories wat ‘n mens oor renosterstropery hoor.
By die park se ingang het ons ons gids, Frank Carlisle, ontmoet. Frank, wat vir baie jare lank as wildbewaarder in die einste park gewoon en gewerk het, is die mede-eienaar en stigter van Bhejane 4x4 Adventures. Duidelik passievol oor die bevordering van toerisme in die omgewing, het hy ons vertel dat Bhejane die Zoeloe-woord vir swartrenoster
