In hul voorkamer in Wemmershoek, Franschhoek, sit Jo-Riah Collins se ma, Joanie (64), moeg en leeg en met trane wat vryelik rol soos sy saggies oor haar pragtige 34-jarige kind praat wat so wreed op Kersdag verlede jaar uit hul lewe geruk is.
Dié pensionaris en haar man, Japie (64), 'n tuinwerker, moet nou op hul oudag hul broodwinner-dogter se twee minderjarige kinders, 'n 16-jarige seun en 8-jarige meisie, grootmaak.
Johnwinn Abrahams (34) staan tereg weens haar moord. Hy het na bewering nie nét hul dogter se lewe geneem nie, maar ook in 'n ander voorval een van haar broers met 'n mes in die rug gesteek. Hy het boonop glo herhaaldelik gedreig dat hy en sy trawante die gesin