EK KAN nie onthou waar ek was toe hulle die oproep gekry het nie. Miskien was ek besig om die vrugtebome nat te lei. Die pruime was ryp, en ek het altyd ’n paar gepluk en in die swembad gegooi en dit dan uitgeduik. Of miskien was ek besig by die rose. Ek was vies omdat dit so pieperig is en nie water op hulle blare mag kry nie, dat ek eers moes wag vir die wind om te gaan lê.
Maar ek weet dit was die dag wat ek die Kersboom opgesit het. Alleen. Gewoonlik doen ek en Sussa dit saam, maar daai dag was haar kop vol bubblegum en boyfriends. Maar ek het nie omgegee nie, want sy het altyd geraas en sê ek werk te rof met die versierings. Dat ek nog die boom gaan omstamp.
En vir die eerste keer in my hele lewe kon ek die ster bo-op die boom sit. Ma en Pa