DUISEND dae. Dit klink dalk soos ’n vreeslike lang tyd, maar wanneer jy besef hoe baie dinge jou klein wonderwerkie alles in die eerste duisend dae moet baasraak, sal jy wens die tyd kon stadiger verbygaan sodat jy meer tyd kon hê om by dit alles uit te kom.
Want dit is in dié belangrike tydgleuf dat die fondasie van ’n kind se fisieke, emosionele en breinontwikkeling vasgelê word. Hoe jou kind vorentoe in die lewe sal ontwikkel, word beïnvloed deur wat in dié tyd gebeur.
“Elke dag van hierdie reis is belangrik en beïnvloed die manier waarop die baba groei, ontwikkel, leer en uiteindelik in die lewe floreer,” sê Venessa T’Hart, spesialisinvroeëkinderjare-ontwikkeling van Cotlands, ’n organisasie sonder winsbejag wat programme oor dié onderwerp aanbied.
Die eerste duisend dae van jou baba se lewe word deur sommige mense bestempel as die tydperk vanaf die oomblik waarop bevrugting plaasvind tot die tweede verjaardag omdat jou baba reeds voor geboorte begin ontwikkel.
Venessa sê jy moet daaraan dink as ’n tuin wat jy begin. “Jy berei die grond voor, vertroetel die saad deur dit water te gee, jy maak seker dit het genoeg son en sorg dat die omgewing geskik is vir optimale groei. Uiteindelik kan jy die vreugde beleef om te sien hoe saailinge begin bot en blom.”
Die eerste duisend dae van kinders se lewe is die tyd waarin hul brein die vinnigste groei, sê dr. Melodie de Jager, skrywer en stigter van die BabaGim-Instituut.“Die brein hou aan ontwikkel tot op