‘NIKS-WORD-TYE’ IN DIE LEWE OOK NODIG
“Jy gaan nooit ál jou kykers tevrede stel nie. Die oplossing is dus om die sterkste storie te vertel. Ek geniet die stories van die Kaapse Vlakte. As jy die mense se waarheid vertel, kan jy die hartklop van die storie hoor.” Ná byna 800 episodes van kykNET & kie se gewilde telenovelle Arendsvlei het Theltom Masimila, hoofskrywer en vervaardiger, duidelik hierin geslaag.
As kind het Theltom oor ’n lewe as skrywer gedroom. Nou het bekroonde SA akteurs soos Shaleen Surtie-Richards al lewe aan van sy gunstelingkarakters se storielyne gegee. “Sy het ’n SAFTA vir haar rol as Muriel Foster [in Arendsvlei] gekry. Dit was so ’n wonderlike eer om voor sy oorlede is tekste vir haar te kon skryf. Ek is baie trots daarop.”
Theltom som 2022 as ’n wegholveldbrand in die middel van ’n droogte op. Naïef is hy nie en weet dat die nuwe jaar weer verskeie uitdagings gaan inhou. Daarom sien hy uit na die Kerstyd om asem te skep en sy geestelike gesondheid eerste te stel.
“Wanneer jy tyd afstaan om stil te sit, vir daardie ‘niks-wordtye’, en alles te sien vir wat dit regtig is, is daar minder chaos as wat jy gedink het.”
