HIER waar Estelle op haar eie in die volgepakte kuierkroeg sit, voel sy skielik heelwat minder selfversekerd as nou die aand tussen haar vriendinne. Dit was toe dat hulle die plan beraam het wat haar nou selfbewus laat voel, selfs ontoereikend, want sê nou maar dit misluk as gevolg van haar? Dalk is sy nie mooi genoeg nie, of te oud. En wat het haar besiel om dié rok met die lae hals te dra? Vroualleen in ’n vol kuierkroeg. Sy voel heeltemal te opgesmuk.
Sy bestel ’n glas witwyn en probeer die plek deeglik deurkyk, so nonchalant as wat haar senuwees haar toelaat. Sy sien ’n hele paar blonde mans; net twee dra ’n bril, maar die een is te jonk en die ander beslis te oud, lankal verby 30. Sy bring die glas na haar lippe om nog ’n sluk te vat, toe sy opkyk en hom gewaar. Dit moet hy wees, Stefan, hoe dan anders?