DOLF was die oggend besig om reg te maak om werk toe te gaan toe hy hoor hoe iemand hard en dringend aan Erik se woonsteldeur klop.
Hy maak sy deur oop. Twee polisiemanne staan voor Erik se deur. Wat het die man nou weer aangevang, dink hy.
“Kan ek julle help?”
“Môre, ek is sersant Josephs. Ons soek na meneer Rabie se mense. Dit is mos sy woonstel die, nè?”
“Dis reg, Sersant, dis meneer Rabie se woonstel, maar hy was lank laas hier.”
“Is jy bevriend met meneer Rabie?” vra die sersant.
“Ja, baie goed. Hoekom soek julle hom? Is daar fout?”
“Ek dink jy moet saam met ons kom, Meneer. Meneer Rabie het homself gisteraand doodgeskiet. Hy het hierdie kort briefie nagelaat. Kan jy saamkom, asseblief?”
’n Drawwer het die oggend op Erik afgekom. Hy is dood in sy kar aangetref in die parkie agter die hoërskool se sportterrein.
Dolf steier effens terug van die skok.