Nuwe fotogids ’n venster op die wêreld van voëls
Daar is al heelparty voëlgidse op die rak. Wat maak hierdie boek uniek?
Die boek bevat werklik die mees onlangse data oor voëls se swerfpatrone. Ons het ook baie moeite gedoen en ver gereis om die heel beste foto’s wat beskikbaar is, in te sluit. Die foto’s is goeie hulpmiddels vir identifikasie, want die voëls kyk almal regs en ons sorg dat alle belangrike kenmerke beklemtoon word. Ons het die boek só probeer uitlê dat spesies wat baie dieselfde lyk, op een bladsy voorkom sodat dit verwarring kan uitskakel.
Die boek bevat ook nuwe inligting waarvan mense voorheen nie bewus was nie. My pa en broer het byvoorbeeld nuwe gedragspatrone opgemerk en dit met ander voëlkykers en ornitoloë bespreek.
