GESKIEDENIS
Die storie van Mokala begin eintlik by ’n ánder park, die Vaalbos-nasionale park. Vaalbos is in 1986 geproklameer en het sowat 22 000 ha beslaan teen die Vaalrivier, wes van Kimberley. In 2002 is die grond ná ’n suksesvolle grondeis onteien en ’n nuwe heenkome moes vir die diere gevind word. SANparke het toe plase van Wintershoek, ’n groot wildplaas en jagonderneming, gekoop. Hierdie grond (19 611 ha), suidwes van Kimberley, is in Junie 2007 amptelik as die Mokalanasionale park geproklameer en vir die publiek geopen. Die wild is in 2006 verskuif.
Ek weet wat mense dink wanneer hulle lees: “dit is ’n plek wat jou weer die kleiner dingetjies in die natuur laat waardeer”. Want ek dink dit ook: Die arme drommel het niks interessants gesien nie.
Tog is dit wat in Mokala gebeur. Jy raak opgewonde wanneer ’n klein bende tarentale na die watergat toe kekkel, want jy weet daar gaan nie ’n leeu of jagluiperd opdaag om hulle kollig te steel nie. (Die enigste lede van die Groot Vyf-klub wat hier hou, is die buffel en die witrenoster.)
Dit was ongelooflik groen toe ek laat in Januarie 2022 Mokala binnery. Met my vorige twee besoeke was hierdie deel van die Noord-Kaap uiters droog en in ’n stadium was daar selfs lusernbale vir die wild uitgesit. Die afgelope twee jaar het die park baie reën gehad. Alles
