KLITSCHKO’S: IN DIE KRYT VIR ONS LANDGENOTE
BOKS is nie vir sissies nie. En niemand wat al teen Wladimir en Vitali Klitschko deur die toue geklim het, sal dit waag om hulle so te noem nie.
Dié Oekraïense broers is albei voormalige wêreldbokskampioene en hulle het destyds ook Suid-Afrikaanse boksers laat bewe.
Maar die afgelope tyd veg die gespierde broers nes hul landgenote om hul lewe teen ’n Russiese oormag. Dis ’n geveg sonder handskoene of skeidsregters teen ’n vyand wat alle reëls minag.
Vanuit die stad Boetsja deel Wladimir Klitschko ontstellende beelde van ’n plein besaai met die lyke van inwoners wat na bewering koelbloedig deur die Russe afgemaai is.
“Wat hier gebeur het, gebeur oral in Oekraïne. Dit is nie militêre teikens dié nie,” twiet hy.
