Wie wil ’n eiertjie lê?

Wie onthou die dokter-se-vrou van die jare sewentig en tagtig: Sy was gewoonlik die dorp se ghrêndste mevrou, die neus gewoonlik so éffentjies hoër in die lug as dié van gewone sterflinge. Sy het in uitrustings verskyn wat min ander kon bekostig óf selfs bekom. Elke haar op die hoof was altyd, oral, op sy plek, en haar duur Duitse vuurwa het immer geskitter soos ’n Sparlettabottel.

Elize van Greunen mag dalk met dr. Andre van Greunen, ’n huisdokter op Joubertina, getroud wees, maar Mevrou Dokter dié is sy nié. En al woon sy op ’n plaas aan die rand van die dorp, is sy ook nie ’n boervrou nie.

Elize is ’n boer en entrepreneur. Iemand wat glo gesonde verstand is die hoofbestanddeel van ’n suksesvolle onderneming – en ’n lewende bewys dat diversifikasie in boerdery nóg mite nóg foefie is. En, as jy so