As Simply Bee ’n byekorf was, was Helena van der Westhuizen sekerlik die koningin, maar nié van die inseksoort wat heeldag in voedsame prinsesselei baai en onophoudelik eiers lê nie. Nee, hiérdie moederowerste gedra haar meer soos ’n werkerby wat nie bang is om haar hande vuil te maak nie.
Al het Simply Bee se winkel, dekorwinkel, observasiesentrum, “fabriek” en spa – alles langs mekaar in Kerkstraat – verlede jaar heelwat minder besoekers as gewoonlik ontvang, het die aanlynverkope met ’n verstommende 600% gestyg én die onderneming het sy beste jaar tot nog toe beleef. Tog sê Helena, immer beskeie, dit is waarskynlik omdat verbruikers meer aanlyn begin koop het – “en natuurlik help dit baie as jy produkte vervaardig wat mense opgebruik en dan weer moet koop”.
Ondanks dié rekordverkope het Helena gedurende die inperking steeds “hopeloos te veel tyd vir dink en rondspeel” gehad. Só het sy stil-stil ’n nuwe vegan-velsorghandelsmerk, Hugo Apothecary, ontwikkel wat reeds aanlyn te koop is. Vir dié luukse botaniese reeks (wat nog nie amptelik as veganisties gesertifiseer nie) het Helena haar nooiensvan as naam gekies – om hulde te bring aan haar pa, wyle Derick Hugo, wat sy “die oorspronklike byeboer” noem en by wie sy waarskynlik haar entrepreneursgene geërf het. Die reeks is bekend gestel met tien produkte en 57 vlugtige olies in
