Brioche
Brioche is veelsydig en kan in enige vorm, grootte en geur gemaak word – van knoop- en hamburgerrolletjies tot brode – net so óf met ’n soet of sout vulsel (soos die pain perdu hiernaas).
Genoeg vir 6
Bereidingstyd 5½ uur plus yskastyd oornag
Baktyd 40-45 minute (lees ook die wenk)
JY BENODIG
• 3 eetlepels (45 ml) warm melk
• 1 pakkie (10 g) droë kitsgis
• 250 g koekmeel
• 25 g strooisuiker
• ½ teelepel (2,5 ml) sout
• 3 eiers
• 1 teelepel (5 ml) vanieljegeursel
• 150 g ongesoute botter, in blokkies gesny en saggemaak
• 1 eier, geklits (vir die eierwas)
• suikerkristalle om oor te sprinkel
SÓ MAAK JY
Meng die melk en kitsgis in ’n bakkie en laat dit eenkant staan. Gooi nou die meel, strooisuiker en sout in die bak van ’n staanmenger. Gebruik die spaanklitser en meng alles teen ’n gemiddelde spoed. Voeg die eiers, vanielje en melk-en-gismengsel by.
Sodra die deeg begin bymekaarkom, vervang die spaan met die deeghaak. Voeg nou die botter bietjies-bietjies by terwyl die masjien loop. Verhoog die spoed en hou aan om die mengsel te knie tot ’n sagte, blink deeg vorm wat nie meer aan die kant van die bak vasklou nie – dit sal so 10 minute neem. Sit kleefplastiek oor en laat die deeg vir 1 uur in die yskas rus.
Haal die deeg uit die yskas en knie dit weer om van die gas ontslae te raak wat met die rysproses opgebou het. Sit dit vir nog 2 uur in die yskas.
Knie die deeg weer af en laat dit dan oornag in die yskas staan.
Spuit die volgende dag kleefwerende kossproei in ’n briochepan. Knie die deeg weer af voor jy dit in die bereide pan sit en vir 1½ uur laat uitrys. Sodra die deeg in volume verdubbel het, kan jy die oond verhit tot 180 ºC (met die waaierfunksie).
Verf die deeg met die eierwas en sprinkel die suikerkristalle oor. Sit die briochepan in die oond en bak dit vir 40-45
