1 Kruipvingerhoedjie (Asystasia gangetica)
Hierdie snelgroeiende grondbedekker is redelik droogtebestand en kom natuurlik voor in die somerreënvalgebiede van Suider-Afrika. Dit word maklik van steggies of saad gekweek. Die plant kom ook in tuine reg oor die land voor waar die wit blommetjies verskeie bestuiwers lok.
Die blare is ’n baie voedsame, gewilde bestanddeel in tradisionele Afrikakosse.
Gebruik dit só Oes stukke van die uitloopsels net voor jy dit wil gebruik (omdat die blare vinnig verwelk). Pluk die blaartjies van die stele af en was dit goed. Groter blare wat op ’n skaduryke plek gegroei het, kan rou of liggies geblansjeer in slaaie en groen smere of pesto’s gebruik word; die kleiner, harder blaartjies kan gaargemaak word soos spinasie, spinasiebeet of die verskeidenheid wilde groen blare wat bekend staan as marog. Gebruik die blare in sop, bredies, roerbraaigeregte, patties of in beslag vir soutige muffins. Dis ook ’n goeie vulsel vir pasteie.
2 Brakvygie (Mesembryanthemum cordifolium)
Dié groen blaargroente wat ’n mens heeljaar kan kweek, kom natuurlik voor in die somerreënvalstreke aan die kus en in die binneland van die Oos-Kaap en KwaZulu-Natal. Dit verdien veel meer erkenning as eetbare gewas as wat dit tot dusver gekry het. Brakvygies skrik nie vir droë toestande nie en vaar