Toe die grondpad avontuur na Dullstroom in die kompakte Suzuki Vitara Brezza tydens ons onlangse redaksionele beplanning aan my geallokeer is, het ek effe ingedoen gevoel. Die manne in die span was op pad Mosambiek toe vir ‘n bos-en strandvakansie en ek moes Dullstroom toe gaan – en dit in ‘n kompakte oorgangsportnutsvoertuig! Hoe is dít nou regverdig?
Kom ek begin by die kar. Ek is nie ‘n klein, fyn meisietjie nie en kon nog nooit lig pak nie (veral nie as ek ‘n plek besoek wat bekend is daarvoor dat dit maklik vier seisoene in een dag oplewer nie), so die “kompakte” deel het my bekommer. Ek het besluit om my dogter en haar vriendin saam te neem en het ernstig getwyfel of ons alles in hierdie klein tjorretjie van Suzuki sou kon inpas. Dit was sekerlik ‘n resep vir ‘n ramp, veral toe ek die weervoorspelling nagegaan het en besef het dat daar ‘n paar nat dae op ons wag. Ek het visioene gehad van ons wat teen die modderige hange van die grondpad-bestemmings wat ek gekies het afgly…
Toe nou nie, my vriende – geen ramp hoegenaamd nie! Inteendeel – ek is aangenaam verras. Nie net deur die