WANNEER ‘SLEG’ GOED IS VIR JOU…
HOE vaar jy met jou Nuwejaarsvoornemens? As jy reeds besgegee het, weet net jy is nie alleen nie. Maar dit kán ’n goeie ding wees. Dalk moet ons eerder as om skuldgevoelens vir motivering te gebruik ons slegste gewoontes tot ons voordeel inspan. Om luier, minder aandagtig, ongeorganiseerd en stadiger te wees kan ons dalk meer suksesvol, produktief en gelukkig maak. Doen dit so.
WEES LUI-LUI BRILJANT
Kendra Adachi, ’n podsendingaanbieder en skrywer van The Lazy Genius Way, is ’n kenner van produktiwiteit wat nie regtig daarop fokus om mense meer produktief te maak nie. Sy stel eerder daarin belang om ons te help uitpluis presies watter dinge in ons lewe vir ons saak maak, en hoe ons dit goed kan doen, terwyl ons lui is – op ’n slim manier – oor alles anders waarvan ons minder hou, soos wasgoed of kos maak.
Ons moet ons lewe so organiseer dat dit ’n weerspieëling is van wat werklik vir ons belangrik is, sê sy, eerder as wat vir ons ouers, kollegas, vriende of bure belangrik is. Dan moet ons die ander dinge laat vaar, selfs wanneer dit sosiaal ongemaklik is.
Vir Kendra was een voorbeeld hiervan om te aanvaar dat sy nie die soort ma sou wees wat uithelp by haar jong kinders se skool nie, maar die soort
