EWIGE LIEFDE ‘IN ’N ANDER PAKKIE’
DIT was liefde met die eerste oogopslag die aand toe sy haar toekomstige huweliksmaat ontmoet het. Dit het haar laat besef sy soek onbewustelik na ewige liefde “in ’n ander pakkie toegedraai”.
Maar op die Suidooster-aktrise Portia Joel se liefdespad na die kansel was genoeg struikelblokke om enige sepiekyker te laat naels kou, veral as jy jou droomtroue midde-in ’n pandemie beplan en die coronavirus en sy jongste variant dreig om alles op die nippertjie te verongeluk.
Ná ’n verlowing van ses jaar en nadat twee troudatums noodgedwonge uitgestel moes word, het die groot dag eindelik einde verlede jaar vir Portia (40) en Romaine Rhoda (36) aangebreek. Maar steeds was die wind van voor.
“Dis die een teleurstelling ná die ander,” sug die aktrise wat net sowat ’n maand tevore ’n TV-bruid was toe haar Suidooster-karakter, Lee-Ann Jacobs, in dié kykNET-sepie met Ty Daniels (gespeel deur Maurice Paige) afgehaak het.
Nou is dit haar en Romaine se beurt. Die afgelope twee nagte het hulle hulle tot in die vroeë oggendure lê en bekommer oor of “die bliksemse covid” hulle sou verplig om hul troue die derde
