BEHOU JOU EKWILIBRIUM DWARSDEUR DIE NUWE JAAR
ONS almal wil plesier hê en pyn vermy – dis instinktief. Ons is so geprogrammeer, al van die dae toe die mens elke dag na kos en skuiling moes soek en gevaar moes vermy.
Maar die wêreld lyk vandag ’n bietjie anders – en in dié wêreld is die bevrediging van ons basiese behoeftes dikwels makliker beskikbaar.
Ons het trouens ons wêreld omskep in ’n plek van oorweldigende oorvloed: nie net van kos nie, ook van allerhande ander dinge wat ons plesiersentrum stimuleer – inkopies, lees-en kykinhoud, speletjies, teksboodskappe, sosiale media, kitskos, drank…
Hierdie oorvloed verander dinge, sê die psigiater en verslawingspesialis dr. Anna Lembke, en om die verhouding tussen plesier en pyn te verstaan is noodsaaklik om ’n betekenisvolle lewe te kan lei.
In hierdie uittreksel uit haar boek Dopamine Nation: Finding Balance in the Age of Indulgence bespreek sy hoe en hoekom ons blootgestel is aan allerhande soorte kompulsiewe oorverbruik.
