EK GEE GEBOORTE AAN ‘VERKEERDE BABA’
DIE dag toe sy eindelik ’n positiewe swangerskapstoets in haar hand vashou, was Daphna Cardinale in die wolke. Jare lank het sy en haar man, Alexander, gesukkel om swanger te raak met ’n tweede kind, en toe hul droom deur vrugbaarheidsbehandeling bewaarheid word, het hulle gedink hul gesin van vier is vervolmaak.
Maar min het hulle geweet dié swangerskapstoets was net die begin van ’n “onophoudelike nagmerrie” – en die begin van ’n hofstryd wat wêreldwyd sou opslae maak.
Want sedert die oomblik dat die Amerikaanse egpaar hul pragtige babadogtertjie die eerste keer daar in die hospitaal kon vashou, het hulle gewonder: Is hier die baba werklik ons s’n?
Die baba het nie soos een van hulle gelyk nie en sy was opmerklik van ’n ander etniese groep as hulle.
