WEG, DIE MAN WAT MY KOM HEELMAAK
JARE lank het sy dié gewraakte woorde van haar aanvaller geglo: “Ek sal seker maak dat geen man ooit weer in jou belangstel nie.”
En in die nege jaar sedert Ina Bonnette (52) van Modimolle in Januarie 2012 wreed deur haar eksman, Johan Kotzé, gemartel, geskend en verkrag is en hy haar ook laat verkrag het, wás dit toe so. Sy was die “slagoffer van die Modimolle-monster” – gebrandmerk en alleen.
Maar toe gebeur die wonderwerk in April vanjaar. Riaan Grobler (57), ’n plaasbestuurder van Modimolle, stap haar kantoor en haar lewe binne en raak halsoorkop op haar verlief.
“Ons het net gekliek. Ek het dadelik op my gemak gevoel by hom,” vertel Ina oor die man wat haar hart ná haar pynlike reis kom heelmaak het. Haar hare is vandag ’n natuurlike grys met bruin strepe en sy dra ’n bril, maar sy lyk beter en jonger as ooit.
“Ek het jare lank met die letsels geloop van wat mense oor my sê: Ek is die halwe vrou van Nylstroom; ek verdien wat met my gebeur het …
“Maar ek het daai pad met Riaan geloop, en hy het gesê: ‘Daar is nie ’n manier dat ek met jou aan my sy sal skaam wees nie! Ek wil op die hoogste dak spring en sê: Dís my vriendin! Ek wil met jou,
