Kansvatter

SY TRAP die brandstofpedaal omtrent plat. Die motor gee ’n effense ruk, ’n harde hik, en verloor sowaar spoed.

“O nee, moenie my nou in die steek laat nie,” kreun sy kliphard. Vervlaks! Het sy ’n kat in die sak gekoop? Die motor is veronderstel om padwaardig te wees. ’n Week tevore het sy die Golf TDI, ’n jaar oue model, diesel, donkerblou en kastig betroubaar, by ’n vriend gekoop om die amper 500 km na Oudtshoorn en die Klein Karoo Nasionale Kunstefees te ry.

Het Annette maar saamgekom, dan was dit gedeelde benoudheid, maar haar vriendin het kwaai griep gepleit. Nou is sy alleen aan die genade uitgelewer.

Sy het Roete 62 gevolg en voorspoedig gery tot by Montagu, waar sy brandstof ingegooi het. Die tenk is vol.

Angssweet slaan op haar uit. Sy stop langs die pad. Mense wat ook na die KKNK gaan, help haar dalk.