Kaalvoet op Greyton
LILLA ry stadig in die hoofstraat van Greyton af. Soek die groot wit huis wat sy uit haar verre kinderherinneringe moet identifiseer.
Dit het ’n breë stoep, met twee vertrekke weerskante waarop daar gewels is. Trappe loop waaiervormig op na die stoep. Langs die breë straat voor die huis moet reuse-akkerbome wees.
Aan die kant van die huis loop ’n houttrap op na ’n solder. Daar het sy, al was dit vuil, skatte ontdek. Soos haar oupagrootjie se pluiskeil wat hy gedra het as hy doerie jare vernaam wou lyk. Dit was vaal van die stof.
Die inwoners van die huis was haar pa se Overbergse familie. Eers sy ma en pa en nege kinders. Toe sy een suster en haar man en twee kinders. Haar pa se eerste wortels was hier by mense wat hulle r’e bry. As avontuurlustige jong man het hy sy fortuin gaan soek
