Vir die meeste motoriste is Laingsburg, 274 km noordoos van Kaapstad, ’n deurry-, oornag-of “pee-petrol-en-pie”-stop op die “pad van die dood”, daardie verraderlike stuk van die N1 tussen Touwsrivier en Beaufort-Wes. Dié Karoodorp laat ’n mens natuurlik ook terstond terugdink aan die vloedramp van 25 Januarie 1981, vanjaar 40 jaar gelede, waarin 104 mense omgekom het en die liggame van 72 nooit gevind is nie.
’n Skamele 21 huise op Laingsburg het staande gebly nadat die Buffelsrivier sy walle oorstroom het – hierdie angswekkende watervlak word aangedui op die oranje Vloedmuseummuur in Voortrekkerstraat, reg by die afdraai na die Vloedmuseumkompleks in Meiringstraat.
Nes jy links gedraai het by die muur, net agter die KFC, sal jy ’n eenvoudige Karoostylhuisie gewaar met ’n lap gras, tafels en peperbome vir skaduwee waar