Koffie & brood van die lewe

Wie is so gek – óf so diep gelowig – om op Aprilgekkedag 2002 in die middel van nêrens ’n padstal met ’n bakkery en ’n belofte van boeretroos (teen R5 per koppie!) oop te maak – en dít nog met ’n tong in die kies naam soos Broodblik en Koffiepit?

Wel, in hiérdie storie is daar drié “skuldiges”, en hulle wag met breë glimlagge in, soos dit mense betaam wat agtien jaar later die laaste – en lekkerste – kan lag. Voor in die koor is die vrolike oud-SAL-lugwaardin Adéle Bester wat in 2005 aangesluit het by die familiebesigheid wat begin is deur haar ma, Letitia van Schoor, en dié se wederhelfte, Sarel, ’n rekenmeester met ’n onpeilbaar geamuseerde uitdrukking op sy gesig. Van voorkoms en stem herinner hy aan die storieverteller wyle Tolla van der Merwe, maar hierdie einste Sarel is in werklikheid die een wat destyds keelvol was vir sy stresvolle lewe op die hamsterwieletjie. (Hy en Letitia het by