Die filmster en die veearts
‘HET jy al die verloofring gekry?”
“Hoe ’n mens enigiets in hierdie dolossak van ’n maag kan kry, sal net die man in die maan weet. Hierdie basset kou en sluk blykbaar alles.”
Danielle lig haar kop van die endoskoop se oogstuk en kyk vraend op na die ontvangsdame. “Alles onder beheer?”
“Oscar se eienaar sit op hete kole. Sy bid jy kry die ring uit voor haar verloofde daarvan uitvind.”
Danielle rol haar skouers en buig weer oor die endoskoop.
“Hoekom laat sy haar ring in elk geval rondlê? So ’n duur verloofring haal ek nooit af nie.”
“Jy sal eers ’n verloofde moet kry,” laat die ontvangsdame hoor.
“Hanna, pleks van om my aan my mislukkings te herinner, sê eerder… amper… nee, vrek.” Die ring bly net-net uit die greep van die tangetjie. Net soos haar greep op kêrels.
“Mnr. Roux se plaasbestuurder het gebel. Hy wil hê Dawid moet
