Sterkmanne, swaargewigte en snaakse stokperdjies
STERKMAN-STORIES
In 1959 bied Landbouweekblad vyf ghienies aan vir staaltjies oor sterk manne.
Verskeie kragreuse laat van hulle hoor:
Die 20-jarige mnr. Lance Tomlinson van Bontebokskloof, Buffeljachts, gooi uitgegroeide Merinoskape teen ’n tempo van 300 per uur soos klein lammertjies in die dipgat. Hy verkies rou kos bo gaar kos en eet elke dag ’n dosyn eiers een ná die ander.
Mnr. Soon Campher van die plaas Ebenhaezer in die distrik Vredefort kon op 16 jaar oud al ’n sak mielies op sy kop lig en dra. Die enigste gewig waarmee hy kon oefen, was die stuk treinspoor wat sy pa as aambeeld gebruik het. Dié kon hy al op twaalf bokant sy kop lig.
’n Brief oor die “Simson van die Knysnabosse” het veral beïndruk. Só skryf J.F. van Huyssteen:
“Hier is die verhaal van wyle oom Ike Cowley, wat ’n wa met houtblokke belaai ’n
