Stuur ons af op Uur Nul?
Dis in die vroeë oggendure, kort ná middernag, 7 Mei 1945. Kol.genl. Alfred Jodl, stafhoof van die Duitse militêre opperbevel, teken ’n dokument waarvolgens die verflenterde paar oorblyfsels van die Wehrmacht onvoorwaardelik kapituleer.
’n Dag later doen die hoof van die Wehrmacht se opperbevel, veldm. Wilhelm Keitel, dit weer in ’n artillerieskool in die Berlynse buurt Karlshorst. Die Russe wou die emosionele bevrediging smaak dat die gehate Duitsers ook onvoorwaardelik aan húlle oorgee.
Dit was, soos die Duitsers dit later self sou noem, Stunde Null (Uur Nul). Dit was die oomblik dat alles waarin miljoene – weliswaar misleide – Duitsers met soveel oorgawe geglo het, in rook opgegaan het.
