Die biddende Vleis

“Daai dominee gaan seker ’n pak slae kry,” sê Ernst, ons werfhaan van ’n faktotum, terwyl hy sy Voyager met sy duim en wysvinger tussen sy lippe rondrol. Elke nou en dan maak hy ’n bol rook in sy mond bymekaar en blaas dit dan in perfekte kringetjies die lug in.

Hoot ’n Toot is leeg vir ’n Vrydagmiddag. Pierre Pond het ’n klomp van die manne genooi om saam met hom Nampo-oesfees toe te gaan. Dit lyk my omtrent almal het besluit om vanoggend saam in die bus te klim.

Dit is net ek en Ernst op die stoep. Vleis Beneke wat in nommer 54 bly, sit binne. Hy sit altyd alleen, sy ken in sy linkerhand gestut, en sy dop klem hy met sy regterhand vas. In sy mond hang daar permanent ’n onaangesteekte Peter Stuyvesant. Die ouens het al probeer om hom