Winkel-winkel is g’n speletjie

In die hart van die ongerepte Kogelberg-biosfeer lê Pringlebaai doeksag op die mees oostelike puntjie van Valsbaai en dut. As ’n mens skemeraand op die strand staan, kan jy Kaappunt se vuurtoring dóér anderkant die golwe sien wink, maar dis so ver as wat die beskawing strek.

Op hierdie sluimerende vakansiedorpie met skaars 2 000 permanente siele kraai die natuur nog koning. Hier’s nie straatligte óf die gewone geriewe soos kettingwinkels, banke en vulstasies nie, en die dorp se paaie is meestal ongeteer. Snags loop daar nog bokkies – en bedags bobbejane – tussen die oop erwe rond… (Gelukkig klim dié bobbejane nooit voor ’n kar se stuurwiel in nie. – Reds.)

Dié stukkie fynbosparadys is behoorlik die teenpool van die platinummyne van Rustenburg in Noordwes waar Adriaan en Ilse Halgryn, albei vroeg in die veertig, jare lank in die finansiële afdeling gewerk het voordat hulle laat