Waarom so WOEDEND?

Ons is woedender as ooit tevore. Suid-Afrikaners ly trouens aan kollektiewe woede, sê Marlaine Pienaar-Vice, ’n sielkundige van die Paarl.

Ons beursies is platter. Korrupsie seëvier. Groot klippe word deur motorruite geslinger. Daar’s nóg’n plaasmoord. Ons is vreesbevange en ontplof daarom maklik.

Hoewel woede’n normale emosie is, behoort mens mos immers nie iemand die teiken daarvan te maak nie. Om passief-aggressief te wees of te skel en te skree, los in ieder geval niks op nie.

Gereelde woedebuie kan tot inter-persoonlike probleme of gesondheids-kwessies soos hoë bloeddruk, diabetes, hartprobleme, beroerte en maagsere lei.

Gesonde woede kan egter positief wees. Soos dr Gary Olivier in Mad About Us: Moving from Anger to Intimacy sê: “Gesonde woede kan ons help om probleme en behoeftes te identifiseer en ons van energie voorsien om iets daaraan te doen.”