WAT NOU WEER?
Met ons gejaagde lewe kan mens nie anders as om soms dinge te vergeet nie. Dis heeltemal normaal. Matige geheueverlies is ook normaal namate ons ouer word. Jy hoef nie in sak en as te sit en dadelik aan te neem jy is besig om demensie te kry nie. Net 1% van mense oor 65 wat normale geheueprobleme het, ontwikkel uiteindelik demensie.
Maar soms moet geheueprobleme nie geïgnoreer word nie. Wanneer dit vir jou moeilik raak om jou daaglikse take te verrig, dinge vergeet wat jy pas gehoor het, dieselfde vrae oor en oor vra en pal moet lysies maak om dinge te onthou, moet jy liefs met jou dokter daaroor praat. Ook as jy dit by iemand ná aan jou opmerk.
