Al weer SIEK?
Ek is moedeloos. Ek is skaars gesond van die een ding dan begin die volgende een. Ek was net nou die dag by die dokter en het die kursus antibiotika voltooi, maar nou is my keel weer seer en ek het nou ook begin hoes,” sê Rika*, ’n onderwyseres en ma van twee.
Wanneer jy gedurig besig is om van die een of ander verkoue of infeksie te herstel, is dit dalk tyd om jou immuniteitstelsel op te bou, veral met die winter om die draai.
Jou immuniteitstelsel is jou verweer teen kanker, virusse, bakterieë en kieme waaraan ons elke dag blootgestel word.
Volgens dr William Mitchell, ’n praktisyn van Seattle wat gevorderde naturopatie aan die Bastyr-universiteit doseer, toon studies dat baie virusse en bakterieë rustig binne ons woon totdat iets binne die liggaam ongebalanseerd raak. Dit is wanneer hulle aktief raak en die liggaam aanval.
