Crystal-Donna vasbeslote vegter
OP 26 MAART 2014 PLAAS CRYSTAL-DONNA ROBERTS ’n foto van haar met geen grimering aan nie op Instagram. Op die papier wat sy vashou, staan: “No makeup selfie. Go to cansa.org.za & donate.” Die #nomakeupselfie-veldtog op sosiale media was gemik op die bevordering van kankerbewustheid. Min het Crystal op daardie dag geweet sy sou vier en ’n half jaar later ’n kankerpasiënt wees.
Al is dit nie maklik om oor haar pad met kanker te praat nie, het Crystal tog besluit om haar storie met rooi rose-lesers te deel.
“Op sosiale media is ons so geneig om altyd die goeie en glansryke te deel, soos my en Schalk (Cornelessen) se troue in 2015, of toe ek laas jaar by die Cannes-rolprentfees was, maar die slegte dinge deel ons dikwels nie en ons moet! Ek dink glad nie ek is meer spesiaal as enige ander borskankerpasiënt net omdat ek in die kollig is nie, maar ek hoop my storie sal dalk ander mense in dieselfde situasie minder alleen laat voel, of vroue aanmoedig om hulle te laat toets en gereeld self te ondersoek.”
Ek is ... genoeg, beeldskoon, ’n vegter, sielvolle gees, sterk, INTELLIGENT, liefdevol, versorgend, lewend, GESOND. Ek kan ...tragedie in TRIOMF omskep!’- Crystal-Donna Roberts
