Ryspoeding met rooswater en pistasieneute
Ons dollie hierdie ekonomiese nagereg op met duur pimperneute, repies lemoenskil en rooswater, maar jy kan dit ook eenvoudig met kaneel en ’n paar druppels heuning voorsit. Geniet dit warm of koud.
Genoeg vir 4
Voorbereiding: 40 minute
Gaarmaaktyd: sowat 35 minute
• 1 liter melk
• 45 ml ligbruinsuiker (of na smaak)
• ’n knippie sout
• 2 ml fyn kardemom
• 1 kaneelstokkie
• 1 reep lemoenskil, al die wit afgesny
• 125 ml jasmynrys, gespoel
• 15 ml rooswater
• 100 g pistasieneute, uitgedop en grofgekap
• ’n strooisel rooi of helderpienk roosblare vir garnering
• 5 ml gerasperde of fyngesnyde lemoenskil
1 Sit die melk, suiker, sout, speserye en lemoenskil in ’n kastrol en bring tot kookpunt terwyl jy roer om die suiker op te los. Draai die hitte laer, voeg die rys by en laat prut rustig tot die rys gaar is en die nagereg begin verdik (sowat 30 minute). Roer gereeld sodat die melk nie oorkook of aanbrand nie.
2 Laat staan ’n paar minute, roer dan die rooswater by en skep in bakkies. Garneer met die neute, roosblare en ekstra lemoenskil.
Rooikerriehoender met klapperroomrys
Hierdie is nie jou-ma-se-pastoriehoender nie, maar ’n bitsige weergawe van dié eenpantamatiegereg uit die 1980’s – mooi genoeg vir ’n spogete, maar maklik genoeg om enige wintersaand so ’n bietjie op te kikker.
Genoeg vir 4 ruim porsies
Voorbereiding: 1 uur
Gaarmaaktyd: 1 uur
Oondtemperatuur: 180 °C
• 30 ml rooikerriepasta (of na smaak)
• 1 klein blikkie (165 ml) klapperroom
• 4 hoenderkwarte, vel verwyder (sien wenk )
• 30 ml olyfolie
• 2 preie of ’n klein ui, gekap
• 4 groot murgpampoentjies, in ringe gesny
• 500 ml jasmynrys
• 1 takkie kerrieblare• •
