‘EK IS IN 1994 GEBORE DEUR IN VITRO-BEVRUGTING. EK STUUR VIR JOU DIE BOODSKAP OMDAT EK VERMOED JY WAS DIE SKENKER’
’NVROU genaamd Rachel het my lewe vir altyd verander. Ek onthou die presiese oomblik: 10:55 die oggend van 6 Oktober 2017.
Ek was in die koffiekroeg van die Ritz Hotel in San Francisco toe Facebook my skielik pieng. “Hi, Peter. Ek stuur vir jou ’n boodskap onder die heel vreemdste omstandighede,” was die boodskap.
“Dis ’n sensitiewe saak, maar om jou bietjie agtergrond te gee: Ek is in 1994 gebore deur in vitro-bevrugting. Ek stuur vir jou hierdie boodskap omdat ek vermoed jy was die skenker.”
My eerste gevoel was skok – en ’n stille ondertoon van trots dat die boodskap so grammatikaal korrek was. En toe slaan ’n golf paniek my soos ’n voorhamer. Op pad na my hotelkamer toe stuur ek die boodskap aan my vrou en my familiegroep.
“Is dit ’n verneukspul?” was my suster se eerste gedagte. Dit was my eerste gedagte ook, om eerlik te wees.
Maar selfs in die greep van die paniek het ek ook geweet dit kan heel moontlik waar wees. In die laat 1980’s en vroeë 1990’s, toe ek naam probeer maak het as vervaardiger en kunsdirekteur in Los Angeles, was ek ’n gereelde besoeker aan twee verskillende spermbanke.
Moenie so geskok lyk nie: Dis $45 per skenking. Jy kon vyf keer
