Stap vir stap
CHAKALAKA-BROODKRANS
Al lyk dié skepping alte indrukwekkend, is dit eintlik verspot maklik.
Genoeg vir 1 groot krans • Voorbereiding: 15 minute Baktyd: sowat 40 minute • Oondtemperatuur: 180 °C
• 650 g bereide brooddeeg
• 1 blik (400 g) matige chakalaka
• 250 ml gerasperde cheddarkaas
• vars basilie, koljander en botter, om voor te sit
1 Rol die deeg uit op ’n meelbestrooide oppervlak tot ’n groot reghoek van 30 x 40 cm. Ek werk graag op bakpapier sodat ek die klaar gevormde brood met behulp van die papier tot op die bakplaat kan skuif. Smeer die chakalaka eweredig oor die oppervlak van die deeg en strooi die kaas ook oor.
2 Rol nou die deeg van een lang sy af op soos ’n dun rolkoek.
3 Sny met ’n skerp mes die rol oor die lengte in die helfte sonder om deur die een punt te sny en draai die twee helftes oor mekaar. Vorm in ’n sirkel en knyp die punte bymekaar sodat dit ’n krans vorm.
4 Sit die broodkrans op ’n gesmeerde bakplaat en bedek liggies met gesmeerde kleefplastiek of ’n teedoek. Laat die brood vir sowat 20 minute rys terwyl die oond voorverhit.
5 Bak die brood tot goudbruin en gaar (sowat 40 minute) en sit dit warm voor met botter.
Stap vir stap
GEKNOOPTE BROODROLLETJIES
Dié veelsydige rolletjies is lekker met botter, kaas en heuning, of span dit in vir mini-burgers gevul met ’n gebraaide vleisie en koolslaai.
Maak 10-12 rolletjies
Voorbereiding: 45 minute, plus rystyd
Baktyd: 20 minute
Oondtemperatuur: 180 °C
• 4 x 250 ml meel, plus ’n bietjie ekstra vir die knie
• 10 g kitsgis
• 30 ml suiker
• 5 ml sout
• 250 ml louwarm water
• 60 ml ongegeurde jogurt
• 1 eier
• 60 ml olyfolie, plus ekstra vir smeer
GLASEERSEL
• 1 eiergeel, geklits
• 15 ml melk
• sesamsaad of kruietakkies (opsioneel)
1 Meng die meel, gis, suiker en sout in ’n groot mengbak. Maak ’n holte in die middel en voeg die nat bestanddele by. Meng die deeg met jou hand in die mengbak totdat dit bymekaarkom. Keer die deeg uit op ’n meelbestrooide oppervlak en knie verder tot glad en elasties – sowat 10 minute (hou moed, dit is die moeite werd!).
2 Sit die deeg in ’n skoon mengbak wat met olyfolie gesmeer is en smeer ook ’n bietjie olyfolie bo-oor die deeg. Bedek met kleefplastiek en laat dit op ’n warm plek rys tot dubbel die volume. Onthou, omdat hierdie ’n verrykte brooddeeg met jogurt en eier is, kan dit ’n bietjie langer neem om te rys as gewone brooddeeg.
3 Verdeel die deeg in 10-12 ewe groot balletjies. Smeer jou hande en die oppervlak waarop jy werk met ’n bietjie olyfolie om te keer dat die deeg vassit. Druk die balletjies een vir een plat en sny in 3 stroke, sonder om deur die boonste punt te sny. Vleg die deegstroke en vou die vlegsel toe in ’n rolletjie. Rangskik die rolletjies met hul naatkante na onder op ’n bakplaat wat met bakpapier uitgevoer is.
4 Bedek die rolletjies weer met ’n vel kleefplastiek en laat dit rys vir sowat 30 minute of tot verdubbel in volume. Klits die eiergeel en melk saam en verf dit versigtig oor die rolletjies. Strooi sesamsaad of kruietakkies oor as jy wil vir die mooi. Voorverhit die oond betyds sodat dit saam met die gerysde rolletjies gereed is en bak die broodjies vir sowat 15-20 minute of tot goudbruin en gaar.
Stap vir stap
PLATBROODJIES MET LAM
Maak 8 broodjies • Voorbereiding: 1 uur Gaarmaaktyd: 20 minute vir die vulsel en 4 minute per sarsie vir die broodjies (36 minute altesaam)
• olie vir vlakbraai • suurlemoenwiggies en