Holistiese boerdery
Klasloop in meganiese ingenieurswese het dalk minder aftrek gekry as sy stookbedrywighede in sy koshuiskamer, maar 25 jaar later werp dié praktiese kennis letterlik en figuurlik vrugte af.
Wanneer Coetzer Hanekom tussen sy wingerde rondry en geesdriftig uiteensit hoe hy boer en alles benut word, hou hy kort-kort stil om ’n druiwetros, blomplant of voël te wys wat vir hom so belangrik in sy holistiese boerdery is. “Dit is belangrik om niks te doen wat die natuur kan skade berokken nie.”
Op die Hanekoms se plaas, Die Mas, waar sy ouers, Vlok (81) en Welna (76), steeds hand bysit, produseer hulle alles wat op ’n druiweplaas moontlik is.
Buiten rosyne, wat vir die grootste inkomste sorg, verkoop hulle ook tafeldruiwe en maak 12 soorte wyn – van rooi tot vonkelwyn – van hul wyndruiwe.
Dit is veral die brandewynvertakking waar die Hanekoms grense verskuif. Coetzer vertel daar is ’n groot oplewing in die mark vir handgemaakte (craft) brandewyn.
“Ons is 14 jaar voor die res van die bedryf omdat ons al so lank gelede begin het. Almal wil nou op die brandewynwa klim, maar hulle het nie tien jaar gelede geskikte wingerd geplant en vyf jaar gelede begin stook en brandewyn in vaatjies opgeberg nie.
Coetzer stook vyf soorte brandewyn: premie-potketelbrandewyn van
