VOLHOUBARE SUIKERRIET Taai pad, maar bevredigend
Biodinamika en suikerrietverbouing word nie sommer in een asem genoem nie. Die 39-jarige mnr. Brad O’Neill van die plaas Seafield by Richmond doen egter baanbrekerswerk met presisieboerdery en volhoubare, biodinamiese praktyke. Hy voeg ook waarde toe met die suksesvolle Sugar Baron-boetiekdistilleerdery wat Agricole-rum maak.
Nadat sy pa, Roger, in 2010 oorlede is, het O’Neill sy werk in die Wes-Kaapse wynbedryf bedank om die heeltydse bestuur van die gesin se droëland-suikerrietplaas oor te neem. Met geen vorige bestuurs- en produksie-ervaring van suikerrietverbouing nie, is hy aan die spreekwoordelike diep kant ingegooi.
“Dit was ’n stresvolle, maar motiverende ervaring. Ek het navorsing gedoen, soveel as moontlik neergeskryf, goeie raad van baie ervare suikerrietkwekers gekry, en is deur ’n nou afgetrede onafhanklike akkerboukonsultant gelei. Ek het ook my pa se deeglike rekordhouding gehad om op terug te val, en ons familieplaas se jare lange personeel het ook baie kennis gehad om te deel.”
Sy pa was ’n vernuwende boer wat in die) as ’n groenbemestinggewas tussen die uithaal en hervestiging van sy suikerriet geplant het. O’Neill se blootstelling aan volhoubare landbouproduksie in die wynbedryf het ook gewys dat multispesie-groenbemestinggewasse die regte benadering is om biodinamikastelsels in sy suikerrietbestuur in te sluit.
