WETENSKAPLIKES skat die ouderdom van die Aarde op sowat 4,5 miljard jaar. Daarteenoor reken hulle die mens en sy aapagtige voorsate bewandel die planeet maar net die afgelope 3,4 miljoen jaar. Dit is maar ’n fraksie van ’n baie lang geskiedenis. Met ander woorde – ons is die nuwelinge in die buurt!
Die mensdom het nietemin gedurende die paar miljoen jaar sedert ons op die Aarde is groot vordering gemaak in hoe ons leef en wat ons alles kan doen. Onthou, in ’n stadium van ons geskiedenis was die wiel die jongste tegnologie.
Die tyd voor ons al ons kennis begin neerskryf het, was die prehistoriese tydperk (voortyd).
